Aisialdi sistema alternatibo bat garatzea Santutxuko Gazte Asanbladaren lehentasunetariko bat izaten jarraitzen du eta bide horretan azaroaren 1, 2 eta 3ko astebururako mendi irteera bat antolatu dugu asanbladatik. Gorbeiako auzo-aterpean finkatuko bagara ere ekintza ugari pentsatu ditugu bazterrak ezagutzeko.

Ostiral goizean irtengo ginateke Santutxutik, jaieguna baita, eta kotxeetan Pagomakurrera joango ginateke. Behin han, txangotxo bat eginez Aldamiñaperaino joango ginateke, han baitago aterpea. Ostiralean bertan, ezagutza jolas batzuk egingo genituzke lotsak ahazteko eta konfidantza irabazteko, documental/pelikula bat ikusiko genuke, eta afalostean berba apur bat egin eta gero oheratu egingo ginateke hurrengo eguna luzea izango baita. Larunbat goizean, gosaldu eta gero, bi aukera eskeiniko genizkieke hurbildutakoei: alde batetik gurutzera igotzea; eta bestetik perretxiko bila joatea animalen aztarnak aztertzen diren eta zuhaitzen berezitasunak ikusten diren bitartean. Bazkalostean, pistak jarraituz, taldeka altxorraren bila ibiliko ginateke eta afalostean sexualitate tailer bat egingo genuke normalean ikutzen ez diren gai batzuen inguruan lagunartean eztabaidatuz. Igande goizean, norberarentzeko denbora librea itzi eta gero, bazkaldu eta apurka apurka auzora bueltan etorriko ginateke.

Janaria eta gastuak ordaintzeko 10€ jarri beharko lituzke bakoitzak, oso kopuru baxua asteburu osorako plana dela kontuan hartuta. Auzotik aurkituko dituzuen listetan apuntatu zaitezkete edota santutxukoga@gmail.com helbidera posta elektroniko bat bidaliz.

Urriaren 30ean, asteazkenean, ikusiko dugu elkar azalpen zehatzago bat emateko eta dirua batzeko egingo dugun asanbladan, arrastiko 8etan Arsuaga plazan. Zatoz!

SANTUTXUKO GAZTE ASANBLADA

AISIALDI SISTEMAREN INGURUKO EZTABAIDA

Ostiral honetarako, urriaren 18rako, dugun aisialdi sistemaren inguruko eztabaida prestatu du Santutxuko Gazte Asanbladak. Zer nolako aisialdia eskeintzen zaigu? Zer nolakoa nahiko genuke? Zenbat eta gehiago batu askozaz hobeto, analisia oso ikuspuntu anitzez osatua izango delako. 17:30tarako dago deitua eztabaida Karmelo plazan; eta euria egitekotan egon lasai, handik AEKra mugituko baitginateke eroso egon ahal izateko. Gazte Asanbladak gainera askaria prestatuko du hurbiltzen diren guztientzako.

Beraz, baduzu ostiralerako plana; zatoz 17:30tan Karmelo plazara gurekin batera eztabaidatzeko!

SGAren Kurtso berrirako Ikastaroak

 

Kurtso berriaren hasierarekin batera, Santutxuko Gazte Asanbladatik, kapitalismo patriarkarrak imposatzen digun aisialdi sistemaren aurrean, auzko gazteek sortua eta auzoarentzat, aisialdi alternatibo eta autogestionatu baten alde, azken aldian aurrera eramandako ikastaro ezberdinekin martxan jarri gara berriro.

Hori horrela, astero, egueztenetan Txalaparta ikastaroarekin, eta barikuetan Euskal Dantza ikastaroarekin aurrera jarraituko dugu, biak, arrastiko 18.00tan burutuko direlarik Santutxuko Arsuaga plazan.

Beraz, badakizue, ez izan lotsarik eta animatu parte hartzera!

Santutxuko Kuadrilen logo berria!

Jakingo duzuenez martxan geneukan logo berria aukeratzeko lehiaketa bukatuta dugu jada. Diseinu nahikotxo jaso ditugu eta atzo bertan, kuadrilen bileran, denak ikusi genituen eta irabazlea aukeratu. Orain diseinu eta diseinatzaile irabazleak aditzera ematea suertatzen zaigu eta horretara goaz ba.

                                                                   Disenatzailea: Nora Inoriza

Zorionak Nora! Aurrerantzean Santutxuko Kuadrilek antolatutako ekintza guztietan zure diseinua erabiliko da. Ez pentsa, gainera, sari barik geldituko zarenik. Santutxuko jaietako azken igandean, uztailaren 21ean, aurrera eramango den sari banaketan jasoko duzu Logo Lehiaketako irabazleari dagokion saria. 

Besterik gabe, parte hartzaile guztiei eskerrak eman nahi genizkieke haien diseinuak prestatzeagatik eta santutxuar kuadrila guztiei deia helarazi nahi diegu batzordera batzeko eta bai heltzear dauden jaietan bai aurrerantzean ere parte hartzeko.

SANTUTXUKO KUADRILAK

Asteko kronika - Gaztetxe berria

JAIO GINEN BIZI GARA! Lelo horren pean Santutxuko Gazte Asanbladak aste oso baterako egitaraua prestatu zuen SGAk hogei urte betetzen dituela ospatzeko. 20. urteurreneko ospakizun aste honetako nondik norakoak azalduko ditugu lehenik, azken orduko berriekin amaitzeko.

Prestaketa lan ikaragarriaren ostean azkenik desiratutako astea heldu zen, ekintzez beteriko astea baina antolakuntzan lan galanta eskatzen jarraitzen zuen astea ere bai. Astelehenean, elektrizitate eta sarrailagintza tailerrean teoria xume bat entzun eta gero esperientzia pertsonalak elkartrukatu genituen giro politean. Asteartean militantzia ikuspuntu feministatik aztergai izan genuen eta parte hartzea txikia izan bazen ere gerturatutakoek aurrera eramandako dinamikak neurri horretako talde baterako ezin egokiagoak zirela baieztatu zuten. Asteazkeneko fieltro tailerrean gazte eta ume elkarrekin ibili ginen eskulanean eguzkiaz gozatzen genuen bitartean.  Ostegunean asanblearismoa eta autogestioa ardatz zituen hitzaldi interesgarria izan genuen, eta egunari amaiera emateko gaztetxe eta gazte asanbladen datuez osaturiko tribialean jolasten ibili ginen alaiki. Ostiralean hainbat SGAkide ohik eta egungo kidek hogei urte hauetako historia kontatu zuten Ritxi plazan, garai bakoitzeko egoera eta bitxikeriak aitortuz. Txit polita izan zen belaunaldien arteko lotura islatzea eta norberaren esperientziak elkarbanatzea. Ostean, aztiak, ostiralero Arsuaga plazan dabiltzan haur, gazte eta heldu andana ahozabalik utzi zuen umorea alde batera utzi gabe.

SGAren historia

SGAren historia

Imanol aztia

Imanol aztia

Konturatu gabe larunbatean geunden, egun indartsuenean egitarau partetik. Goizean Arsuaga plazako tuneltxoan egindako rokodromoan eskalatzen, plazan bertan hockey taldearen porteria batzuk kokatuta sortutako futbito zelaian jolasean edo txalaparta jotzen ibili zen jendea. Gazteez gain ume ugarik ere hartu zuen parte goizeko ekintzetan. 

Arsuagako rokodromo berria

Futbitoa Arsuagan

Futbitoa Arsuagan

Bazkarirako tiketen eta kamiseten salmenta

Txalaparta

Txalaparta

Ordu bi t’erdietan bazkaria izan genuen Ritxi plazan. Jendetsuagoa espero bazen ere, janari gozoak eta bazkalosteko barrez lehertzeko bakarrizketak nahigabeak ahaztea eragin zigun antolatzaileei. Guztia batuta, Akelarre Sound System-en eta grafiteroen ordua heldu zen. Lehenak gerturatutakoak girotzen zituen bitartean bigarrenek mural itzel bat egin zuten, jendeak oraindik ez bazekien ere, gaztetxea bihurtuko zen lokalaren atarian. Baina gero gerokoak, jarraitu dezagun egunaren kronikarekin. Murala amaitzean auzoko errepresaliatuei bidaltzeko argazkia atera zen bertan “EUSKAL PRESOAK GAZTETXEETARA” zioen pankarta baten atzean. 

Bazkaria

Bazkaria

Amaiurren bakarrizketa

Amaiurren bakarrizketa

Akelarre Sound System

Akelarre Sound System

Grafiteroak muralean lanean

Grafiteroak muralean lanean

Grafiteroak muralean lanean

Presoei bidaltzeko argazkia

Panel informatiboa

Arineketan Karmelo plazara mugitu ginen guztiok, berandutu egin baitzitzaigun eta kontzertuek hasi beharra baitzeukaten. Bastardos del Rey-k punk errebindikatibo batekin aurreko beste garai batzuetara eraman gintuen, Sardeska taldeak dantzan jarri gintuen bere ska musikarekin eta Soltek, beti legez, bere hardcore basatiarekin sorgindu gintuen. Tartean ekitaldia izan genuen. Urte hauetako irudiekin bideoa, asanbladaren irakurketa, dantza ikuskizuna, kide izandako presoen parte hartzea… Hunkigarria izan zen benetan.

Bastardos del rey

Sardeska

Sardeska

Sardeska

Solte

Ekitaldia

Ekitaldia

Kontzertuekin bukatu eta berehala, kalejira batez, murala egin zen tokira bueltatu ginen eta bertan okupatu berria zen lokala azaldu genion auzoari, eraikina duela hogeita hamar bat urte sortu zenetik hutsik eta erabilpenik gabe egon dena (txosna bat egiten zen bertan aspaldi urtean aste batez, jaietako astean); autogestioan eta auzolanean oinarrituko zen proiektuari hasiera emanez. Atea zabaldu egin zen eta auzotarrek gaztetxea izango zena barrutik ikusteko aukera izan zuten. Atarian, grafiteroek beste pixka batez ukituak ematen egon ziren muralaren aurrean, beste argazki bat atera genuen gerturatutako guztiok eta hurrengo eguneko, igandeko, 19:30etarako asanblada deituz eman genion amaiera egunari baita ospakizun asteari ere.

Gaztetxea barrutik

Gaztetxearen atarian

Igandeko asanblada gaztetxea kokatuta dagoen plazan egin genuen, eguzkitan. Bertan astelehenean auzokideei proiektua azalduko zien buzoneoa egitea adostu genuen, baita gaztetxea garbitzeko eta atontzen hasteko lan egunak ere. Astearte eta asteazkenean goizeko 11:00etan eta arratsaldeko 17:00etan. Asteazkenean, gainera, arrastiko 20:00etan gaztetxearen inguruko asanblada ireki bat egitea erabaki zen. Ilusioz gainezka geunden guztiok; horrelako proiektuetan harremanak asko sendotzen baitira, parte-hartzaileek asko ikasten baitute eta auzoa biltzeko toki bihurtzen baita, beste gauza ugariren artean. Irrikitan geunden lanean jartzeko.

Gaztetxearen ataria

Gaztetxea barrutik

Gaztetxea barrutik

Gaztetxea barrutik

Gaztetxea barrutik

Atariko murala

Gaztetxea Ritxi plazan

Astelehenean, buzoneoaz gain, eskuz egindako kartelez josi genuen auzoa enteratu ez zenak ere jakin zezan gaztetxe berria genuela auzoan eta lan egunak zehaztu genituela guztion artean aurrera eramateko. Asteartean, lan egunarekin hastera gindoazela, Bilboko udaltzaingoekin egin genuen topo gaztetxean. Jabeak salaketa jarri zuela jakitera eman zuten eta horregatik haiekin zegoen sarrailagileak sarraila aldatuko zuela  esan zuten. Sarrailagilea ez genuen batere lagun izan gainera, udaltzaingoei atea kalitate txarrekoa zela esan baitzien eta segurtasunezko bigarren sarraila bat jartzea gomendatu baitzien. Kabroia! Gazte ugari hurbildu zen gaztetxera ekintza hori salatzera eta udaltzainak han iraun zuten sarraila biak jartzen amaitu zen arte, baita gaztetxea dagoen Ritxi plazan ere goiz osoan zehar. Arratsalde horretarako bertarako premiazko asanblada deitu zen zer egin erabakitzeko. Auzokide batzuen informazioaz lagunduta hainbat datu lortu ditugu eta bide horretan jabearekin kontaktuan jartzea eta negoziatzea da gure asmoa.

Munilloak gaztetxean

Hala ere, behin eta berriz aldarrikatu dugu auzoan gazteok eta ez hain gazteok sistema honek bultzatzen duen kontsumismoan jausi barik harremantzeko espazio fisiko baten beharra. Bai gazte asanbladak bai auzoko edozein beste eragilek dinamikak eta ekintzak aurrera eramatea posible egingo lukeen espazio aske baten beharra. Eta udalak ez duenez inondik inora atzamarrik mugitu nahi horrelako proiektu autogestionatuen alde, okupazioa tresna gisa baino ez zaigu gelditzen herritarrei, eta batez ere gazteoi. Negoziazioen bitartez akordio batera heltzea litzateke aukerarik onena guretzat honek dakarren egonkortasunarengatik, baina ez lortzekotan betebehar moral bat bezala ikusten dugu interes espekulatzaileek horrenbeste denboraz lokalak hutsik mantentzea salatzea, eraren batean edo bestean; horretarako, behar izatekotan, okupazioa bera erabiliz, zergatik ez.

                Badira bederatzi hilabete Uztaldi gaztetxetik bota gintuztenetik eta berau hormatu zutenetik, eta denbora guzti honetan ez dugu espazio fisiko baten beharraren aldarrikapenean etsi. Horretarako ekimen ugari egin ditugu auzoan, gaztetxe baten egin daitezkeen ekintza ugariren islapena adibidez, baina kalean jarduteak duen garrantzia ere behin eta berriz aitortu dugu. Kalean daude herritarrak eta haiengan eragin nahi badugu bertan egon behar dugu guk ere. Gaztetxe batek ematen dizun laguntza ahaztu gabe, sistema kapitalista patriarkar hau iraultze bidean kaleetan egon behar dugu batik bat, alternatibak sortzen eta beste eredu bat posible dela erakusten. Gaztetxe berrian, beste lokal hutsen batean, baina batez ere kaleetan ikusiko dugu elkar!

JAIO GINEN BIZI GARA! Jaio ginen bezala bizirik jarraitzen dugu, eta jarraituko dugu!

OKUPAZIOA AURRERA!

Santutxuko Gazte Asanblada

Aurten ere, jaietan, Playback, Mozorro gaua eta Bideoklip txapelketa

Aurten ere, urtero legez, Santutxuko Kuadrilek egitarau polita prestatu dute auzoko jaietari begira. Guztien artean aurretiaz aipatzekoak, prestakuntza eskatzen baitdute, Playback, Mozorro gaua eta Bideoklip txapelketa. 

Uztailaren 18an, ostegunean, Playback txapelketa izango dugu basarraten arratsaldeko 8etatik aurrera. Ostean, Mozorro gaua hasiko da; beraz, joan zaitzete bai playbacka bai eroango duzuen mozorroa prestatzen. Gainera, aurten, Photocall bat antolatu dute kuadrilek, gaueko hamarretatik ordu batetara egongo dena.

Uztailaren 20an, berriz, Bideoklip txapelketa izango dugu Trikizio berbenaren atsedenaldian, beraz hasi zaitezte pentsatzen eta grabatzen honek lan gehiago eskatzen du eta. Halaber, eguenean photocall-ean ateratako argazkien bistaratzea izango dugu atsedenaldi honetan ere.

Hartu ezazu parte Santutxuko Jaietan zure kuadrilarekin batera!

SANTUTXUKO KUADRILEN LOGOA EGITEKO LEHIAKETA

Santutxuko Kuadrilen Batzordeak bere logo berria diseinatzeko lehiaketa abiarazi du. Ekainak 30 baino lehen bidali beharko da diseinua santutxu.kuadrilak@gmail.com helbidera eta bi egun geroago, hau da, uzatailaren 2an blog honen bitartez emango da jakitera diseinu irabazlea. Irizpideen artean SANTUTXUKO KUADRILAK agertu behar dela, fondo gardena izan behar duela eta .psd edo .png formatuan bidali behar dela zehazten da. Beste guztia diseinatzailearen esku (koloreak, irudiak...). Irabazlea uztailaren 2an argitaratuko bada ere, saria auzoko jaietan jasoko du; jaietako azken domekan, Uztailaren 21ean, egingo den sari banaketan.

JAIO GINEN BIZI GARA, Santutxuko Gazte Asanbladak 20 urte!

Ospakizun garrantzitsua dugu Santutxun laster. Gazte Asanbladak 20 urte betetzen ditu aurten eta aste osoko egitaraua antolatu da horren harira, ekainaren 10etik 15era. Ospakizun berezia izanda, egitaraua ere mailakoa behar zuen eta ez dugu horretan kale egingo.

Astelehenean Txispas eta Cerrajeria tailerra izango dugu arratsaldeko sei t’erdietan auzoko AEKn. Asteartean “Militantzia ikuspuntu feministatik aztergai” tailerra izango dugu Ritxi plazan eta zazpi t’erdietatik aurrera eta asteazkenean fieltro tailerra zazpietan Basarraten. Ostegunean, ekainak 13, Okupazioaren inguruko hitzaldia egongo da Lakomi plazan zazpietan eta ostean, bederatzietan, Gaztetxe eta Gazte Asanbladen tribiala izango da Arsuaga plazan hasita. Ostiralean, “Jaio Ginen Bizi Gara” lelopean Gazte Asanbladaren hogei urteko historia kontatuko da Ritxi plazan arratsaldeko seietan, eta bederatzietan Imanol magoak ikuskizuna eskainiko du Arsuagan.

Larunbatekoa, ekainak 15, egun potentea izango da. Goizeko hamaiketan hasita Rokodromoa eta Futbolin erraldoia egongo da Arsuagan, eguerdiko ordu bi t’erdietan Ritxi plazan bazkaria hasi arte. 10€ ordainduta bazkaria eta urteurreneko kamiseta jasoko dute hurreratutakoek. Bazkalostean, lauretan, bakarrizketa eskainiko digu Amaiurrek plazan bertan; eta plazan ere, bostetan, Akelarre Sound System, murala eta presoei bidaltzeko argazkia aterako dugu. Amaitzeko arratsaldeko seietan hasita kontzertuak eta ekitaldia izango ditugu Karmelo plazan. Bastardos del rey, Sardeska eta Solte taldeek joko dute.

Aste osoan zehar SGA kide izandako guztien parte hartze zuzena espero dugu, beste auzokide eta bilbotarrenarenaz gain.

SANTUTXUKO GAZTE ASANBLADA

Uztaldi gaztetxearen aurkako epaiketa

Santutxuko Gazte Asanbladaren oharra:

Gau bertan, hilak 27, goizeko 11ak inguruan, Bilboko epaitegietan Santutxuko hiru gazte epaitu dituzte Uztaldi Gaztetxearen okupazioa egotzita. Hiru gazte hauek 3600€ko eskaerari egin behar izan diote aurre, 1200€-ri bakoitzak. Hauetariko bi, kalean identifikatuak izan zirenak, absolbituak suertatu dira; gaztetxetik irteten identifikatutakoari, ordea, akusazioa mantentzen diote era ulertezinean, hori erabiltzen baitute froga bakar gisa okupazioa asteak lehenago aurrera eraman bazen ere. Epaiaren zain gelditzen da dena beraz.

2012ko apirilaren 21ean Santutxuko Gazte Asanbladak hamar urte baino gehiagoz erabat abandonatua egondako lokala okupatu eta auzorako berreskuratu zuen. Hilabete batzuez auzorako gazte askorentzat bilgune bihurtu zen lokal hura, proiektu sendo eta anitz baten ikurra bihurtuz.

Lokala "La Caixa" banketxearen jabetzakoa da, zeinek hamarkada luze batez inongo erabilerarik eman gabe eta guztiz utzita mantendu zuen. Okupazioa gertatu eta berehala, ordea, salaketa aurkeztu zuen, urte bereko irailean desalojoa eragin zuenak. Bederatzi hilabete pasatu diren honetan, guztiz hutsik jarraitzen du, desalojo egunean eraiki zuten hormaz itxirik.

Halaber, lotsagarritzat jotzen dugu gazte batzuk “La Caixa”-ren lokal huts bati bizia emateagatik epaituak izatea, banketxea bera izan beharko lukeenean epaitua burutzen dituen desjabetze eta kaleratzeengatik.

Santutxuko Gazte Asanbladak bere elkartasuna helarazi nahi die epaituak izan diren gazteei,  era guztiz arbitrarioan identifikatuak izan zirenak. Era  berean, okupazio mugimenduaren kideen kontra ematen den kriminalizazio eta inputazioak salatu nahi ditugu, jabetza eskubidea beste eskubide guztien gainetik jartzearen ondorio. Legedi honek espekulatzaileen interesak babesten ditu jendartearen beharrizan errealak kontuan izan gabe.

Bukatzeko, Santutxuko Gazte Asanbladak beste hiri eta jendarte eredu baten alde lanean jarraitzen duela adierazi nahi du, alternatibak eratze bidean lokal hutsen okupazioa ere tresna gisa erabiliz. Ez baitaukate gure ametsak tapiatzerik!!

BALOREEN EZTABAIDA

Hurrengo Ekainaren 1ean, larunbata, SGAk aukeratutako eguna da sistema kapitalistak gure jendartean imposatutako baloreen inguruan egin diren eztabaidei txapela jartzeko. Azken eztabaida honetan, imposatutako baloreak nola eraikitzen eta inpostazen diren zehaztuta, eta hauek jada identifikatuta  norbanako zein kolektibo mailan zelan eman diezaiokegun erantzuna zehaztera goaz, nola koherentziaz joka definitzera.

Beraz, Santutxuko AEK-n itxaroten zaituztegu arratsaldeko 8etan gurekin azken eztabaida hau eman dezagun!

Santutxuko Gazte Asanblada

Zer nahi duzu jaietan?

Aurreko urteko jaietan parte hartzea era nabarian hazi bazen ere Santutxuko Kuadrilen Batzordea ez zen guztiz asetu. Horregaitik, eta parte hartze hau handitzeko asmoz, aurten auzotarrek jaietan zer nahi duten galdetuz datorkigu. Era honetan, auzotarrek nahi dituzten ekintzak antolatuz, jai herrikoi eta partehartzaileak sustatuko dituzte auzoaren mesederako.

Ideia guztiak jasotzeko datorren barikurako, maiatzaren 10erako, hitzordu bat deitu dute iluntzeko bederatzietan Karmelo plazan. Agertu ezin izatekotan mail bidez (santutxu.kuadrilak@gmail.com) edo tuenti eta facebook bidez (Santutxuko Kuadrilak) ere helarazi ditzakezue zuen proposamenak.

Kuadrilarekin etortzera animatzen zaituztegu guztion artean jaiak asko hobetu ditzakegulako!

Bertso-askaria eta Koktel Gaua

Datorren barikurako, maiatzak 3, beste jai bat antolatu du Santutxuko Kuadrilen Batzordeak. Zortzietan bertso-askari-afaria izango dugu Arsuaga plazan Jone Uria eta Imanol Uria bertsolarien eskutik. Janaren gastuak estaltzeko pertsonako 5€ eskatuko zaizkie bertaratutakoei. 

Ostean, hamar t'erdietan hasita eta auzoan lehen aldiz, Koktel Gaua izango dugu. Taberna ugarik hartuko dute parte lehen edizio honetan koktel ezberdinak prestatuz. Ibilbidean zehar geraldi ezberdinak egingo dira eta koktelak dastatuz joango gara. Koktelera bakoitzetik berau probatzeko txupito nahikotxo urtengo litzateke eta, osagaien arabera, 4 - 6 €-ko prezio izango dute. Koktel bakoitzari nota bat jarriko dio kuadrila bakoitzak eta ordu bat t'erdietan Arsuaga plazan errekontua egingo dugu taberna irabazlea jakitera emanez. 

Parte hartzera eta gurekin ondo pasatzera animatzen zaituztegu!

Drogen inguruko eztabaida!!!

Iristear da drogei buruz gazte asanbladak antolatutako eztabaida!!

Gozatzeko tresna? kontrol sozialerako tresna? Askatasunerako tresna? Askatasuna eragozteko tresna? Nola definituko zenituzke zuk drogak? Gazteon eguneroko errealitate den fenomeno honen inguruan hausnartuko dugu guztion artean, prestatutako baliabideak baliatuz.

Gai interesgarria benetan… hori dela eta, Gazte Asanbladak etortzeko gonbidapena luzatzen dizue Santutxuko gazte guztioi!

Larunbatean, arratsaldeko 17.00tan Santutxuko AEKn, Padre Pernet kalean